dandaniw

SIPSIPUTAK DAGITI TUMATAYAB
Adda latta ti imatang kadagiti sanga
Dagiti silalamolamo a kayo: sipsiputak dagiti tumatayab
No pagturonganda kalpasan ti makauram nga aplaw
Ti angin. Agpaabagatanda kadin?
Wenno sumurotda kadagiti kurarapnit
Nga agbayanggudaw iti sumipnget?
Ngem diak maawatan ti riknak no maminsan
Ta sumrek iti panunotda ‘toy isip: ahhh…
Agkalkallautangda kadagiti disierto
A puso ti daga; sumsumgiab dagiti dapanda
Nga agsapsapul naimeng a pagumokanda!
Ket inton ibbatak ida iti panunotko, diak metten ida masirayan
(Agtagtagainepak kadi no kasta a sipsiputak ida?)
Ti laengen naangrag a kayo ti napatak
Dagiti agar-arasaas a samiweng, nagpukawda payen!
Ngem diakto latta kauma ti mangsiput
Kadagiti umay-pumanaw a tumatayab iti imatangko
Ta apaman nga agarbis iti puso ti tao
Agungar ti silalamolamo a kayo, agtitiponto ditoy
Dagiti tumatayab a mangibbet iti ayug
Iti amin a suli ti aganges-anges ita a lubong!

SAMIWENG

Kantaen manen ‘toy agpaparaw a karabukob ti samiweng
A naputar kadagiti nasipnget a kalsada ti siudad.
Manon a palasio ti tinapatak a nagpikapikan ‘toy rikna
A nangipatayabak iti duayya ‘toy kullapit a barukong?
Ngem, ay, maregmeg latta ti grasia iti mapirpirsay payen a supot!
Maluktan ketdi dagiti tawa ti napagsisilpo a rukapi a yero
Tunggal kurengrengek ti samiweng iti agkuplaten a gitara
Ket mayula dagiti mayang-angin a kararua nga agbirbirok met
Iti banga ti balitok iti murdong ti bullalayaw.
Ngem kas kalawag ti pulpito dagiti annak ni Midas: agsangsangit
Dagiti tipping a malukong iti an-anayen a panganan-pagturogan!
No koma ti ruangan a landok ti maluktan iti lamuyot-ayug
‘Toy barukong, agrimat la ketdi dagiti lesseb a mata
Ti ubing a namnama nga agkunkunnot iti inangin a mamador!
Ketdi, di agkettang dagitoy ramay a mangkurengreng
Iti kuerdas- ipatayabko latta dagiti maputar nga ayug
Uray agpaparawen ‘toy karabukob ken agrengngaten ti puso.
Ammok, maurayko ti bisibis a mangpalam-ek
Iti nadagaang nga agsapa iti muging dagiti bulong-apatot!
(Ta adda kaniak dagiti sariugma da tatang!)
(Tawid News Magasin, Agosto 6-12, 2007)

maikankanta ti pater noster kadagiti dalan


agbibiahe met ti pater noster iti inaldaw
makilinlinnetlet kadagiti aglulumba a dapan
maigamgamay iti agrarek nga ispiker
masugsugat iti makaipas a ngayemngem
dagiti padana a pasahero!
naimbag a kanitoyo amin, kakabsat
bendisionannakayo koma ti kangatuan
adtoy ti tinapay a namasa iti ebanghelio
siaayatkami a mangibinglay kadakayo
ta ti parabur agubbog nga awan sarday
iti tunggal pirsay ti kapitulo ken bersikulo
ket ti ima ti Ama ti mangaywan
itoy a panagdaliasatyo
iburayyo koma ti adda kasdakayo
ta agsubli daytoy iti maminsangapulo
kappia ti Dios ti ibatimi
adtoy ti sobre ti salakan…
adu dagiti nakabatbati ken nakatukno iti atang
pinagpleteda ti nakunes a sobre!
(ngem agluganto latta ti pater noster
iti kanto a pagidissaagan ti drayber
ta urayenna sumaruno a biahe!)
TIKAG

nakaro unay daytoy a tikag
pagrengngatenna uray ti dan-aw
laylayenna uray ti ginasut a tawen a kayo…
daytoy a tikag saan laeng nga iti daga
adda a nakamulagat nagbaetan agkakabsat
adda iti laem ti pagtaengan
adda iti inaladan ti eukaristia
adda iti puso ken panunot
adda iti barukong ti lubong
agur-uray ti amin iti arbis
ngem alimukeng sa man ti dam-eg
ta di man la mawaknitan
ti ulep a nangabbeng iti isip
(no koma laeng ukraden ti dakulap
ket itukitna ti bin-i ti agsapa
aglua la ketdi ti langit!)

(Tawid News Magsin, Agosto 13-19, 2007)




AGTARTARAOK TI KARASAEN

iti nasapa a sardam, natinggaw ti taraok
ti karasaen iti sementado a kabakiran
agur-uray iti tukkawanna nga idaton
dagiti agrukbab kenkuana, idinto a mabalkot
iti aligagaw dagiti agpidpidut iti regreg
kadagiti kinamanaw a sarming a lamisaan
ta sabali manen a pannakaidasar ti yula
ti damag iti sumuno a bigat!
agingga nga agtagtag-ay ken agaariangga
dagiti nakaungap a ngiwat iti kalkalsada
ken dida agpatingga a mangbambansag
kadagiti itlogna, tuminggaw latta
ti taraokna iti sardam.
saan a kumna ti panagsepsep iti barinatnat
ken panagtandok
wenno uray ania a santiguar
a mangpasubli iti napukaw a karkarma.
(adda pannakasapul iti mannumang
a mangpadso iti gita ti pannakaidaton…)



ibarsakko ti pamato

pinggiten no kua ti panunotko ti rimat
dagiti addang a pangisuyo iti pamato
ta kayatko a siak ti kano iti daytoy nga ay-ayam:
binnaragan ‘ti lastiko nga adda palabesna.
ngem anansata ta maipakkik ti siglat
iti kappit dagiti kabusor, rumsik pay
dagiti mabkang a lati iti daanen
nga ispraket; itanamitimko lattan
ti panagmintis dagiti sarunuek
ta inton ibarsakko ti pamato
mabuntal dagiti aman ket lumbesda
iti linia ti balligi

ngem no mapaikinganto laeng dagitoy
baliwakto manen ti wagasko, sirigek
a naimbag, ukkonek amin a pigsak
ket isuyokto latta ti anus a mangitugot
kadagit lastiko iti pagturongan
ti pamatok.

inton akuyek amin nga aman
mangibatiakto iti tengnga
ta ti dangadang, agtultuloy latta
agingga nga adda pagkanuan…

(Bannawag, Hunio 25, 2007)





Ti Orasion

agal-al-al ti ang-ang ta di agpatingga a tumanawtaw iti entablado ti rikna a naputar iti an-anayen a tarikayo. agibasbaslag iti baraha a sineksekna laeng iti bukodna a pannakaawat ket ipilpilitna a balasaen dagiti simotsimot tapno iti pananggangatna iti pagsilawan pinggipinggiten dagiti uratan a ramay agingga a didanton kayat ti tumakder iti tinugawanda a lawlaw ti atong. pumuskol dagiti asuk ti innuman ket malamayan ti napasag a karirikna ngem ti ang-ang di latta mapnek kayatna a maitabon uray ti binting nga isem! aguyaoyton ti dilana inton maawatanna a tinarayna a sinarak ti temtem dagiti ipaspasindayagna a kinapudno (koma, dinto pay naadasan iti dara ket maitanamitimna ti orasion ti panagbabawi!)
(Tawid News Magasin, Nobiembre 5, 2006)

Ti Panagmula Iti Dulin A Bukel

narukopen ti alad iti barukong, nawayan dagiti ayup nga agdakiwas kadagiti naitukit a bin-i: ibusenda uray apagtubo laeng idinto a kubkoben dagiti dadduma pati ramut. inton panawanda ti bangkag ti puso nagnaanton ti bagyo, nakaronton ti pannakaluglog! saludsodekto manen iti bagik: kaano a masarakak ti kawayan a tinenneb ti panawen, ti darekdek a dinto anayen, ken bamban a dinto mapugsat? kalpasanna, in-inutek latta a patubuen dagiti iduldulinko a bukel: iti panagtutudo yalisko ida iti kapanagan ti barukong ket taripatuek ida iti dam-eg ni ayat ken panagibi ti mabangon latta nga alad ta mamatiak a matumpongakto met laeng ti sapsapulek: ket dinton laklakaen a dugsaken dagiti walang nga ayup ken peste! (ta iti panagmula masapul ti panagsibug!)
(Tawid News Magasin, Nobiembre 5, 2006)

SAPULEM TI KULLUONG

Sapulem ti kulluong iti burayok ti puso
Mangpedped iti kimraang a nakem
A sinutil ti angin dagiti didiosen:
Namaga, wumaneswes, umatiberret…
Puso ti burayok iti kulluong ti sapulem.

Sarukangam ti taeng iti kappia ti kaunggan
Ta dinto ket aggidday iti apagdillaw nga aplaw
Dagiti maitagtag-ay latta nga ima ti salakan:
Nakaimet iti nangisit a krus!
Kaunggan ti kappia iti taeng ti sarukangam.

Itukitmo ti bin-I iti kapanagan ti isip,
Mangabbukay iti linnaaw nga umagep
Iti nadagaang, agal-al-al a lubong ti kinapudno:
Sadino ti kanigid? Sadino ti kanawan?
Isip ti kapanagan iti bin-i ti itukitmo.

Sapulem ti kulluong iti burayok ti puso…
Sarukangam ti taeng iti kappia ti kaunggan…
Itukitmo ti bin-i iti kapanagan ti isip…
Kulluong…
Taeng…
Bin-i…
Dagitoy ti aweng idiay Belen
Pagubbogem ‘ta biag ket ililinakanto ti samiweng!

(UMUNA A GUNGGONA, Salip ti Daniw iti RFAAFIL 2006-2007)
(Reader’s Choice Award)


NO KOMA AGAYUS ITI PUSO TI DIRO

umariangga latta ti ginnubal dagiti arapaap nga umaddang
iti naikari a daga a pagubbogan diro a mangugas
iti pitakpitak a bagis ti agdama.
idinto nga um-umkis barukong ti masakbayan
nga agiturtured iti sakit pannakarangrangkay
a di met pannakasinasina: ta adda kadi pay pumadpad
iti saning-i dagiti di makakunail a kabakiran
iti ngernger mabisin a chainsaw?
adda kadi pay nakaskas-ang ngem iti panaggidday
dagiti bantay a kurkurikoran agpagunggan a makina?
adda kadi pay naledledaang ngem iti dung-aw
dagiti agayus nga ubbog iti ridaw ti agdama?
adda kadi pay nasasaem ngem iti ipas-kusilap angin
no dumuros alingasaw nakabatbati nga aglawlaw?

ah, ta no agugas ti kaputotan iti pitakpitak a bagis
aglabatiba met ti nappelan a nakaparsuaan:
maiburuang dagiti penned, mayanud dagiti sarikedked
ket rumasok ti pudot a mangsultop iti di mapaltot
nga inaw ti lubong!
agangsab ti kaputotan…

(no koma la agayus iti puso ti diro
aglua la ket ti langit a mamaglunit kadagiti rettab…)


(UMUNA A GUNGGONA iti maikapito a panagpasalip ti AVAIL)




PISANGEK PAY TI PISANGPISANG A SAEM
A truly national language is a fusion of different dialects and languages- Constitution.

agallon latta ti pug-aw iti alintatao
ti nainaw idin a sakab ti paragpag
ti agam-ampayag a sarming-tugot
dagiti masikog a kapanunotan
tapno agtagilasag dagiti rurog
ti nabambantian itan a singgalot
nga urat iti Amianan.
paltoten no kua dagiti sanaang
ti agpasikal a bunga ti ikkis
dagidi malalaki iti mungay
ti Suso ta dumteng ket dumteng
ti panawen a dumanum ken agpadara
ti pumsuak a semilia dagiti naitukit
iti barukong ni Aran
kadagiti makatitileng nga ulimek
ti parbangon.
ket inton agtaraok dagiti saem
pisangekto manen ti pisangpisang
a kambas-saem ti timmarukoy nga urat
ti di pay nalukaisan a luppo
ni Aran tapno rumtab ti isem
ti kayanak a sinamar
ti napagtitipkel a sapot!

(Maikadua-A-Gunggona, On-the-Spot Poetry Writing Contest, 33th GF Kombension, Sto. Nino, Seaside , Tabucolan, Santa, Ilocos Sur)


INTON MAWARA TI PENNED

padasek latta nga itukit iti papel
ti lua dagiti naarnas
a bin-i ti padas iti rusok
ti kanal a nagudaodan ti pursige
a kumarab-as iti pader
ti ngatangata a nangbalud
kadagiti naruay a ganetget
bareng agrusing iti dayas
ti agsapa a pagtaltalukatikan
ti linnaaw ket agramut
iti nadam-eg a puso a mangitudonto
iti namituen a langit
a ngudo koma ti tunggal arapaap
ngem no malungtotto dagitoy
adda latta panagsagibsib ti puso
ta dinto agtabon ti init
kadagiti mapasag nga addang
ad-adda ketdi a rumusing ti essem
a mangwara iti penned
tapno agayus met laeng ti bisibis
a naurnong iti maymaysa a pagsaadan
inton dumteng dayta a tiempo
mawarasanto amin a bin-i iti dam-eg
ket awanton ti panaglungsot…

(Tawid News Magasin, Hunio 2007)

(Bannawag, Enero 28, 2008)





URAYEK LAENGEN

Iti tunggal agsapa a karaip baro a namnama
Idagidaginak ti kari a data laeng a dua
Iti aldaw ken rabii ni ayat.
Kasano nga agmaymaysaak iti paraangan ni arapaap?

Iti tunggal kinnit-init ditoy bagi
Mangnamnamaak a sikat’ mangsebseb,
Mangitunda kaniak iti salinong ayatmo a natarnaw.
Kasano a dimmapoak nga agayat?

Iti tunggal malem a lumnek ‘diay init
Ur-urayek abrasa ti panagsublim
Nga imetmo tulbek binukelta a masakbayan.
Kasano a nalukagak nga awanka’t dennak?

Ita, ditoy balay, saan a pagtaengan
Urayek laengen pannakaipasngay
Ti bin-i a pinanawam nga agbalinto a saranay
Iti inalllawig nga arapaap ken biag!

(Tawid News Magasin, Oktubre 22-28, 2002)
Ti Aso a Nangmulagat iti Mannaniw

Sumsumgiab ti barukong ti daga
A mangay-ayam iti aso
Iti tengnga agkiamkiam a kalsada
Saan a masnop ti taliawenna
Abagatan, amianan, wenno dagiti ubbing
A karinrinnay-aw ti aglako iti pisbol
Iti sango ti ruangan ti elementaria.
Maay-ayatan ngata iti arimbangaw dagitoy?
Wenno agrebrebolusion met ti boksitna?
Wenno dina masungbatan no apay
Nga agingga iti dayta a gundaway adda latta
Iti isipna ti bislak nga inyagyag itay
Ti amona a naggapu iti sugalan?

Dinan sa ket marikna ti kinnit ti init
Ket nagbalin sa payen a tuleng iti banipbip
Ti sumungsungad a motor a pagdaydayyengan
Ti mannaniw.
Naggilap lattan iti mugingna a masapul nga agtaray
Ta addaytan ti bislak a nakalayat
Ngem naladawen. . . nagdappuoren ti lubong.

Idi taliawenna ti bumegbeggang a dalan
Bumangbangon dita ti mannaniw:
Agwingwingiwing iti baet ti ut-ot
A mangkitkita kenkuana a naidasay
Iti sanguanan agngatngatingat nga ubing.
Sinubadanna iti mulagat ti wingiwing. .
Ti padana a mabisin a mannaniw
Sa in-inut a nagkidem. . .

(Bannawag, Mayo 21, 2007)

PANAGLIWLIW

Ti naganus a bulo masapul a salingsingan
Palinisen a kas sumilsilap a talunasan
Ibilag agingga a maluoman
Iti murdongna igalut ti sangaagpa a singdan
Iti maysa a ngudona bitinan iti sima
Ta inton matutudo yanusan nga ibirokan
Tukak-bat-og a yappan
Manggargari kadagiti dalag a sumikmaw
Ngem no naangin, naatap ti panagdawi
Yuraymo manen sabali a rabii
Idawatmo a natalnanton ti aglawlaw
Ken nakalemmeng metten ‘diay bulan.
Tapno apaman a sumangbay ti bigat
Dinto manen agdung-aw ti dulang…
(Bannawag, Setiembre 4, 2006)

DARADARA A KAWES
adtoy dagiti daradara a kawes, agur-uray
iti labutab ti sabon ken ingel ti kulada:
ti agsasanggala, agsasallapid a saka
iti tokar a nabuniagan iti malakaniang;
ti masikog a bulsa iti pork barrel
a nainaw iti senado ken kongreso;
ti bukod nga ay-ayam dagiti agsisiim
iti pagaraban iti paraangan ti kapitolio;
ti masumada nga aldaw ken rabii
a pagbibinggawan iti kusapo a lamisaan-munisipio;
ti nalanit a kidkid iti latok
ti nakatapaya, nakapannimid a barangay;
ti bangbangir nga isem ti agit-itlog a kali
iti tangatang ti ekonomia;
ti musmusiigan ti pitakpitak a dapan
nga aglulusiaw a dawa kadagiti kinelleng;
ti anglem dagiti mapasag a namnama
iti gatilio dagiti antukab!
Ama, kadagita bakrangmo, agayus koma ti kalis
nga an-anibmi kadagiti an-annong
(ta saanen a kabaelan ti atang ken panyang!)
(Tawid News Magasin, Hunio 2007)
SANGA

naimatangak, nagsaringit manipud iti puon:
natingra, naganus, nabaludbod—
makaay-ayo, mangikarkari adu a bunga!
timmangken, nagsalumpayak, nagaponan
adu a tumatayab: napno ti kapanagan
kadagiti makailili nga ayug!
tinayana ti pudot ken lamiis:
nagtalinaed dam-eg ti daga!
ngem, ay, nagayaw, nalipatanna
ti nagsabong ken nagbunga
agingga a dimteng ti bagyo
a nangruros kadagiti bulongna,
a nangseppak iwagwagaywayna a gemgem—
naisina iti puon!
minulagatan ti init:
nauram… dimmapo!
iti nakaspakanna: rimtab dagiti saringit
manamnama a dinto sumurot
iti binusatanna a tugot…
(ti dapo iparrais laeng ti angin!)
(Tawid News Magasin Hunio 2007)
BARATILIO TI LASAG
adu latta dagiti mangikarkari iti mulagat
ti init nupay nanglangeb tangatang
iti lubong binangonda: mamati dagiti babassit,
siggawatenda uray regreg dagiti maidiaya
ta iti panunotda agay-ay-ayam ‘diay leleggakan-init!
ngem, ay, iti lubong ti bullalayaw maimatangan
a maymaysa maris ti nagkorona iti kari:
nakadalungdong iti nangisit!
sadiay maibaratilio ti lasag kadagiti derrep
agbibinggawda iti sangkapirgis a pannakapnek
di makita espasio ti isusupiat,
napurar makasisirap a pirak?
nakiddit ubbog iti dan-aw, mauram-kararua
nga agur-uray bisibis ti langit
ta anansata nalmes iti pilaw dagiti salakan
iti ganggandiong nga aritos ti rang-ay!
maatiananton lua dagiti gumawgawawa
napirpirsayton maibarbaratilio a laslasagda
ngem dinto kabaelan nga idasay ti derrep
ti puso ken isip a naayusan iti dara ti biag
(ti bagi agrupsa, ti aramid agnanayon iti lagip!)

saludsod ti sumasaludsod a di met agsalsaludsod

ania ti rupa ti balligi iti ima dagiti maidaton a kararua
iti nagan agruprupsa a bagi ti salakan?
kasano a tumpuar ti bullalayaw
no kanayon met a nanglangeb ti tangatang?
adda kadi naikali a gameng iti sirok naliktad nga agdan
ta apay a binukibok dagiti narungsot a makina?
apay nga agpalaud dagiti tumatayab
no sumingising ti ubing pay nga init?
mano pay a kutsara ti dara ti mayalison iti agkiamkiam
a daga sakbay a maalaw daytoy ti biagna?
kasano kapait ti lua nga agayus iti bantay-kalbario
tapno laeng di makulisip dagiti mammartek ti basi ti kinapudno?

(mano pay a saludsod ti mainaw iti muging ti lubong
sakbay a masay-op ayamuom dagiti sabong?)

UNGOT TI KINAPUDNO
(Ken ni Lilong Roman Matias)

Kumarasakas dagiti dawa iti saplit
Ti agpagunggan a rikna riniwriw nga ikikinnit
Ngem ti tarigagay di man la naeppes
Sitatakder latta nupay kumkumotan dagiti elep.
Ngamin sika ti apuy dagiti arapaap
Sungrod iti manglangeben a namnama
Ken pedped pannakawaw sang-aw
Baresbes nagares, natikag a duayya.
Linukagmo dagiti mata ti wayawaya
Iti inkayabmo a yaalsa kadagiti tanap ken aplaya
Nupay nakiddit ubbog pannakitakunaynay
Iti nagan ti talna, nasam-it ti maidasay.
Imkis ti mission: “Get Aparri!”
Timmangadka a nangtimud iti ayug
Dagiti dawa ken pandan nga ilillili
Angin iti nasapa a parbangon.
Nasiit dana nga agpa-Linao
Ngem nabengbengen dapan iti tarumamis
Ta nasged tarigagay a mangadak
Ti lubong baro nga aldaw.
Adu dagiti inluges ti anglem a kadaraan
Iti adalem ken naallon a sabangan
Ngem sika latta ti sika a kawar
A di napekka iti rungsot dagiti sugat!
(Bannawag, Hunio 4, 2001)
KARAYAN CAGAYAN

Adda lamiis nga agkarayam iti uray
Dagiti annak ti Tanap. Ay, ti karayan
Nagtagilanga dagiti an-annong ti siudad:
Agiinnuna dagiti bao ken ipes nga agkaradap,
Agsisip iti taraon kadagiti estero ti kinatao
Nga agtunged kadagiti di maputtot nga agus;
Ay, agsasallupang dagiti rimer ken ungaw ti anges
Iti lubong dagiti ludong, unnok ken gakka
Idinto nga agkakamakam ti panagtunglab
Ti puso iti di maabbengan a masakbayan…

(Bannawag, Pebrero 21, 2005)




IKET NI TARIGAGAY

iduronko ita makina ti kinatao
iti kadaratan ti awis
ta panurnorek arapaap
iti sabuag-parrais dagiti dalluyon.
uray isadsadnak iti taaw
iwayatko latta iket ni tarigagay
ta kalapek met grasia ti bannawag…
kumpasak dagiti allon
nupay sagangennak ti yo
ta sinanamaak a duprakenna
batibat ti iket!
gasolinaak met latta iti anus
ti apres a lamina agpakada a malem
ta daliasatek latta ti damka
ti paamo ken sirut
ta inton agiddep bagnosko a parola
itundanak met a siiisem iti linak
ti maipasngay a sinamar.

(Bannawag, Hulio 19, 1999)

SAGAYSAYEM ‘TA BIAG


Makuso a kas buok ti biag
No kasta a digosem iti tarigagay
Ken sabonan iti regget ken anus.
Ket inton punasan iti plano
Agmaga dagiti napintek a kapanunotan
Ngem sagaysayem latta
Bareng maregreg dagiti lasi
Ti lutuen a masakbayan
Wenno sugodem iti maminggasut
Bareng matnag ti kuto
Ti pasalsali a pannakapaay
Ken napino dagiti linabag
Ti sumangbay a bigat.
Saanmo a pulagidan ‘ti duadua
Ta dita kumpet dagiti rituer
Ti umaplaw a dangadang.
(Naputar, Pebrero 12, 2000, 8:45 P.M.)
(Bannawag, Setiembre 8, 2003)



YUGEDKO LATTA ‘TOY TISA

Napaksuyanak iti nagpatnag a panangisagana
Bisual eyds, leson plan, plaskard ken no ania ditan
A kasapulan iti panangibisik sangkabassit nga ammo--
Adda pauyo ni kasimpungalan,
Nalam-ek payen ti nagbaetanmi ken Dayunyor.
Ngem anansata nadagsen ti naipabaklay
A sinapataan a pagrebbengan
Nupay natuok ti panangplano no kasano
Nga ikur-it ‘toy tisa iti blakbord
Ken no ania a wagas panangyallawat iti sirib,
Mariknak latta ti kinakawaw iti siled,
Ti sabali nga anag nga ikut dagiti ubbing.
Abalbalayka iti imatangda ta agan-anninaw
Iti isipda ti kuadrado a lubongdagiti bola,
Dagiti agpipinnaltog iti TV ken kompiuter—
Ti awis ti baso iti lamisaan ti pakalemmesan
Dagiti bunga ti ling-et— adayoda
Iti balitok a balikas ti henio ti Calamba.
Ngem adda dagiti kas ken ni Dayunyor
No apay a yugedkonto latta ti tisa
Uray iti agkupkuplaten a blakbord…
(Bannawag, Setiembre 10, 2007)

maulit-ulit ti pammati dagiti di mamati a naarusda

maulit-ulit ti pammati dagiti di mamati a naarusda
namanipolar kano ti agsapa a nangitag-ay iti manto
nabayadan ti timek ti bolpen ken kararua.

naliwliwa ti kaaduan iti an-annong ti isem ken sarsarita
adu ti tugot dagiti simmurot iti naitanem a prinsipio
maulit-ulit ti pammati dagiti di mamati a naarusda.

di makaidna ti natinggaw a namnama
mangikarkari latta iti nabuslon nga ubbog ken nalasag a pitso
nabayadan ti timek ti bolpen ken kararua.

awan siled panangaklon iti rimat bituen-daya
nangina payen ti isem nga agubbog iti puso
maulit-ulit ti pammati dagiti di mamati a naarusda.

sagmamano kadi ti dayaw dagiti agtaytaya?
ania met ti maidasar iti altar a kita ti luto?
nabayadan ti timek ti bolpen ken kararua.

nadagaang ti aglawlaw ti maipasngay nga agsapa
agur-uray iti linnaaw wenno agek ti tudo.
maulit-ulit ti pammati dagiti di mamati a naarusda,
nabayadan ti timek ti bolpen ken kararua.










diak kayat a makita ti ipakpakitam nga isemmo

diak kayaten a makita ti ipakpakitam nga isemmo
naibusen ti naigarapon nga asukar ti pammateg
awanen ti matubbo nga unas ti karayo.

mano pay a siit ti maipalok iti puso sakbay nga agngudo
ti saem dagiti immarrabis a kidmat ken gantil?
diak kayaten a makita ti ipakpakitam nga isemmo.

nabayagen a naukas ti ules ni lailo
nagmawmawen ti bara ti tunggal maimaldit nga agek
awanen ti matubbo nga unas ti karayo.

makitintinnawarak iti panawen nga agtultuloyen ti bagyo
kayatko a di mawaknitan nanglangeb a sipnget.
diak kayaten a makita ti ipakpakitam nga isemmo.

itangtanggayam dakulapmo iti uray tipping la ni taripato.
kunam a kayatmo manen agitukit iti bukel
awanen ti matubbo nga unas ti karayo.

ania kadi ti nagan ‘di nasapataan iti altar ti Apo
saan kadi nga ayat agingga iti maudi nga anges?
diak kayaten a makita ti ipakpakitam nga isemmo.
awanen ti matubbo nga unas ti karayo.










gatangek ti lagip iti paraangan ti kinaaddam dennak

gatangek ti lagip iti paraangan ti kinaaddam dennak
ipintak latta iti kambas ti aw-aw ken kalawikiwmo.
agbiagka ti agnanayon iti isip ken kaunggak.

adda duayya dagiti naumbi a panagdilpat
tumayab dagiti di mailadawan a kettang iti trabaho.
gatangek ti lagip iti paraangan ti kinaaddam dennak

diak nakita, diak narikna ti inka panagtukiad
kadagiti diak mapuotan a damsak addaka a nakakurno.
agbiagka ti agnanayon iti isip ken kaunggak.

awan panaginkukuna panagbalinmo a kabadang
sukisokem rumiet a kabakiran sagutmo nga alingo
gatangek ti lagip iti paraangan ti kinaaddam dennak.

daytoy biag a mapugsatan koman iti linas, sinilpuam
indatonmo ti bagim a taraon ti gita ken limdo
agbiagka ti agnanayon iti isip ken kaunggak.

binukiradmo dagiti matak nga iti kaunggan-ayup adda di magatang
a kinaimbag a kayatyo met nga ipamatmat ken makita iti tao.
gatangek ti lagip iti paraangan ti kinaaddam dennak.
agbiagka ti agnanayon iti isip ken kaunggak.









agur-uray ti pagilian iti maidasar a pammigat

agur-uray ti pagilian iti maidasar a pammigat
nangina ita ti tig-ab kadagiti pamedped.
ti biag di koma metten nakusel, ittip wenno nasuprak.

agduduma ti mayik-ikkis nga estratehia-sungbat
ti agkukulot, agsasanga a babantot-dagensen,
agur-uray ti pagilian iti maidasar a pammigat.

di ammo ni angkuan ti nagan ti sumangbay a bigat
nakamulagat latta ti dulang a bunga ti ling-et,
ti biag di koma metten nakusel, ittip wenno nasuprak.

adda latta dagiti ramay a makiin-innarasaw iti pitak,
di agngudot’ tarigagay a makasukain tulbek ti langit.
agur-uray ti pagilian iti maidasar a pammigat.

adda panagtudo iti pingping ti pagilian nga agur-uray
ti di pannakayangin dagiti kari a naisasainnek.
ti biag di koma metten nakusel, ittip wenno nasuprak.

naandur latta met ti duri ti kayumanggi a patapat
agingga nga adda bigat agbitek latta ti anges--
agur-uray ti pagilian iti maidasar a pammigat,
ti biag di koma metten nakusel, ittip wenno nasuprak.










mabayadan itan uray ti inangin a mamador


mabayadan itan uray ti inangin a mamador
nalabit iti masungad uray payen no ladawanna laeng.
mano nga ubbing ti mabsog laeng iti apros?

di mabuniagan ti maibakbaklay a ritur
napegges ti agus a kumarab-as iti nakanganga a tanem,
mabayadan itan uray ti inangin a mamador.

napanan kadin dagiti naitagtag-ay a salakan nga andur
ti nattangan a bagi iti pannakikinkinamat iti malem?
mano nga ubbing ti mabsog laeng iti apros?

maiddep kadi metten ti pabelo ti anus
ita ta nakidditen ti lana a matawing kadagiti masirib?
mabayadan itan uray ti inangin a mamador.

saggaysaek a saludsoden dagiti alutiit no pumarbangon
maisangbay kadi ti gatas ti ina kadagiti saltek?
mano nga ubbing ti mabsog laeng iti apros?

kullapit latta ti pakabuklan ti ubing a madiram-os
agingga a di agtimek ti konsensia ti langit.
mabayadan itan uray ti inangin a mamador.
mano nga ubbing ti mabsog laeng iti apros?









agay-ayamda iti koriendo ngem dida kayat ti matapo


agay-ayamda iti koriendo ngem dida kayat ti matapo
agplesingak met kadagiti di masiiman uray alibot
ngem kayatda ti kanayon nga umuna iti pulpito.

uray kitikitanda ti dalan iti sabrak ken sangdo
awan maitag-ay a gemgem, maala amin iti ar-artiok,
agay-ayamda iti koriendo ngem dida kayat ti matapo. .

nabayagen nga isuysuyok bolintek tapno pumasango
ta kayatko a suroten naruburob ngem pudno a tugot
ngem kayatda ti kanayon nga umuna iti pulpito.

tantantiaek ti disso a pagturongan ti bolintekko,
no dadduma kunaek a pinis tapotapo, awan sursurot.
agay-ayamda iti koriendo ngem dida kayat ti matapo.

dangandanganek ti tuskitek a kinapudno
ta kunkunak a bareng siak ti umuna a makaungpot,
ngem kayatda ti kanayon nga umuna iti pulpito.

agingga a dida awaten ti linteg ti koriendo
agkasapulan latta iti laya dagiti mapalpalteg a sigud.
agay-ayamda iti koriendo ngem dida kayat ti matapo
ngem kayatda ti kanayon nga umuna iti pulpito.









di magabenan a sagadan dagiti matnag a bulong


di magabenan a sagadan dagiti matnag a bulong
dinuros ida ti gantil ti di mailadawan a panawen,
nasapa yaagekda iti sumsumgiab a lubong.

natibker met ketdi dagiti napagtitipkel a pangurnong
ngem iti kaunggan dagiti iit adda panagkitakit.
di magabenan a sagadan dagiti matnag a bulong.

masul-oy ti pigsa iti arapaap a panagdalus
di latta ket koma nga ipallais ida ti angin.
nasapa yaagekda iti sumsumgiab a lubong.

aglamolamo dagiti kayo iti panawen ti panagsulbod
nakiddit ti maibiahe dagiti ramut a pamedped,
di magabenan a sagadan dagiti matnag a bulong.

aglua met dagiti iit bayat ti inda panagkuykoy
masilmutan naluom, naata a bulong a napempen.
nasapa ti yaagekda iti sumsumgiab a lubong.

kasapulan ti lua ti langit dagiti sabong
ngem nanginan sa payen uray isbo ti andidit.
di magabenan a sagadan dagiti matnag a bulong.
nasapa ti yaagekda iti sumsumgiab a lubong.









nadawel ti agbangon a dalluyon uray nalinak ti panawen


nadawel ti agbangon a dalluyon uray naulimek ti panawen.
kabutengko ti tumaneb nga agugas iti tikkab,
diak kayat ti maki-ay-ayam ta saan daytoy nga aleng-aleng.

kabassitan nga allon nagatang kadi metten?
makurukor ti pantok iti bogus a sikbab.
nadawel ti agbangon a dalluyon uray naulimek ti panawen.

agumbi-umbi ti dalluyon a dumilpadilpat laeng
ngem masirsiripko ti awiwit a nakamulagat.
diak kayat ti maki-ay-ayam ta saan daytoy nga aleng-aleng.

masilsilmutan barukong ti taaw iti sangkapirit a sirib
agsasainnek ti kaputotan a maidasar iti altar.
nadawel ti agbangon a dalluyon uray naulimek ti panawen.

umal-alingasaw ti sang-aw ti lansad nga aganges-anges
map-appelan ti urat ti irurukuas ken ikukuy-ad.
diak kayat ti maki-ay-ayam ta saan daytoy nga aleng-aleng.

agtigtig-ab latta dagiti aggatgatang iti anges.
makitintinnawar met dagiti barawbaraw iti sumangbay a bigat.
diak kayat ti maki-ay-ayam ta saan daytoy nga aleng-aleng.
nadawel ti agbangon a dalluyon uray naulimek ti panawen.









saan laeng a panawen ti kampania ti basingkawel


saan laeng a panawen ti kampania ti basingkawel,
panawen pannakalangeb dagiti namituen nga arapaap.
agkuy-ad baro a paragpag namnama ken kinasirib.

makurob dagiti pitak iti nasapsapuan a talingenngen
agkudaap dagiti naingpis ti bolsana iti dangadang,
saan laeng a panawen ti kampania ti basingkawel.

aglipias dagiti pagdaydayawan kadagiti agsamsamuyeng
mabaduan iti panaginkukuna ti naimbag a damag,
agkuy-ad baro a paragpag namnama ken kinasirib.

gumarut ti ayat nga imparnged ti adu a panawen
agkalkal ken agmaya ti agbuabo a rignas.
saan laeng a panawen ti kampania ti basingkawel.

mabsang ti karuas a pakaipisokan ti sagbibinting
nga abuloy iti maidaton a karkari nakatukno ti atang.
agkuy-ad baro a paragpag namnama ken kinasirib.

sapulento latta ti kaputotan ti malalaki a panggep
a mangikub-ay nainderrepan a a raas.
saan laeng a panawen ti kampania ti basingkawel,
agkuy-ad baro a paragpag namnama ken kinasirib.









amarilio ti maris ti mailaklako a masakbayan


amarilio ti maris ti maipakpakumpra a masakbayan,
rumtaben dagiti ruot iti damo pay laeng a bisibis.
saan a magaw-at ti ugaw a dulang ti anaraar.

mapuypuyatan dua bukel a bolintik iti sibay
agkurkuridemdem a segden tapno biag masukit.
amarilio ti maris ti maipakpakumpra a masakbayan.

mabaybayadan ti uppat a suli a lamina ti kettang
aganikki ti duri kadagiti payapay ti sirib
saan a magaw-at ti ugaw a dulang ti anaraar.

agar-ari dagiti itta kadagiti nakabigao a bagas
saan a kumna ti tar-ap ti anus ken saldet,
amarilio ti maris ti maipakpakumpra a masakbayan.

aggangganar dagiti bukatot nga uray awananda iti puonan
mabekbekkel dagiti agpilit a makasirip pirgis ti langit.
saan a magaw-at ti ugaw a dulang ti anaraar.

agiwes-iwes latta ti biahe ti karison ti pagilian
agingga nga adu iti kalsada dagiti agbasingbasing.
amarilio ti maris ti maipakpakumpra a masakbayan.
saan a magaw-at ti ugaw a dulang ti anaraar.









aglingling-et ti baso nga umas-asimbuyokan ti kape


aglingling-et ti baso nga umas-asimbuyokan ti kape
agkalamrin sa ketdi iti appayaw ti ngayemngem.
anusan ti lam-ek agbuot payen a karekare.

addada latta dagiti malipatan no maminsan a kari
kasapulan ti pannakisipat tapno agmulagat ti lagip.
aglingling-et ti baso nga umas-asimbuyokan ti kape.

naimas koma a ngatingaten iti agsapa daing a taburki’
nga isawsaw iti sukat’ sili ngem nangina pay ngaminen.
anusan ti lam-ek agbuot payen a karekare.

matagtagiuray pannakalekkab iti kambas agdelirion a lati
kibkibkibannan pundasion pagtaengan a naipasdek,
aglingling-et ti baso nga umas-asimbuyokan ti kape.

manon a panawen a ‘toy lam-ek di man la mapadisi?
kumuddot ti kinapudno a ti bara mapukpukawen.
anusan ti lam-ek agbuot payen a karekare.

natubbog itan pagtawingan naingel a basi.
ngem ‘di napateg a sapata iti altar nairaman a nailimogen.
aglingling-et ti baso nga umas-asimbuyokan ti kape.
anusan ti lam-ek agbuot payen a karekare.









agtakoak man met ita iti gakka uray rusangis ken karibuyo


agtakoak man met ita iti gakka uray rusangis ken karibuyo
naimas nga ibulon iti nakamulagat a kilabban,
di magatang ti isem a gubbuayen pannakapnot’ tako.

naganas nga ilasin ken pidutpiduten ti naala kadagiti bato
karkuluen no umanayen nga igatang bagas ti mapaglakuan,
agtakoak man met ita iti gakka uray rusangis ken karibuyo.

ilut-iluten ti siket tapno maiwagsak pannakablo
punnuen barukong iti makabang-ar nga aplaw.
di magatang ti isem a gubbuayen pannakapnot’ tako.

siim-siimen ti dumilpat nga allon a mangparungbo iti rugso
yanud ti dalluyon ti bunga ti ling-et no di makumpasan--
agtakoak man met ita iti gakka uray rusangis ken karibuyo.

sumsumgiab barukong kadaratan a kasinsinnangdo
ngem di latta mauksot ti sukote agingga a kalawakaw ti alat.
di magatang ti isem a gubbuayen pannakapnot’ tako.

iti itatakdang, kagantil ti bunga, barukong mapno ti karayo
isursor met ni kabinnulig kasukat ti di naiitta a bagas.
agtakoak man met ita iti gakka uray rusangis ken karibuyo.
di magatang ti isem a gubbuayen pannakapnot’ tako.









di maparmek ti erkon ti kiamkiam iti kinamanaw a siudad


di maparmek ti erkon ti kiamkiam iti kinamanaw a siudad
maslep iti ling-et ti agkalkalimduosan a panunot.
kasapulan ti arakup inkakaubingan a pul-oy-amian.

agpaspasion dagiti billit-tuleng iti tuktok dagiti balbalay
mapno ti lugit iti laem barukong a di makesset ti atong.
di maparmek ti erkon ti kiamkiam iti kinamanaw a siudad.

awan agayus uray pitak kadagiti sirok ti rangtay,
pinenned dagiti marabutit ti kanal iti surong.
kasapulan ti arakup inkakaubingan a pul-oy-amian.

masmasdo dagiti maitagtag-ay a dakulap
a makikinkinnamat iti panagluganda iti lubong.
di maparmek ti erkon ti kiamkiam iti kinamanaw a siudad.

sadino itan ti duayya ti agilad iti sirok ti kakaykayoan?
agdidinnaeg dagiti bato a nangpadisi kadagiti bulbulong.
kasapulan ti arakup inkakaubingan a pul-oy-amian.

agiinnuna nga aglinong dagiti paddek iti pasdek-pagtagilakuan
ngem ti alingasaw tunggal maysa agalibungabong,
di maparmek ti erkon ti kiamkiam ti kinamanaw a siudad.
kasapulan ti arakup inkakaubingan a pul-oy-amian.









sakaek iti daniw dagiti naisalda a kari


sakaek iti daniw dagiti naisalda a kari
iti ponsiap ti bin-ig a panagganar.
tumaytayab ti interes agatpitak a dir-i.

agkaraiwara dagiti awanan nagan a saning-i
kayatko ida nga ipinta iti kambas-biag,
sakaek iti daniw dagiti naisalda a kari.

kontarek no kua imetko a bayad ti kaasi
ket mariknak panagbangon ti aliaw.
tumaytayab ti interes agatpitak a dir-i.

nababa unay apreysal balyu ti pammati
kurang nga isaang iti agdungdung-aw a dalikan.
sakaek iti daniw dagiti naisalda a kari.

adda ngudo panagubbog ling-et ti bagi
maatianan a kas iti adalem a karayan.
tumaytayab ti interes agatpitak a dir-i.

naatap ti tig-ab iti dulang dagiti ari-ari
awan mabati uray sangkamaregmeg a murkat.
sakaek iti daniw dagiti naisalda a kari.
tumaytayab ti interes agatpitak a dir-i.









mapno manen iti arimbangaw kawaw a siled

mapno manen iti arimbangaw kawaw a siled
dua bulan a nagdung-aw saksi tapoktapok a tugaw,
masakbayan maituloy latta a mayuged.

naglalang-ay ubbing kadagiti babassit a ridep
impennekda a sinipsip diro panagbayanggudaw,
mapno manen iti arimbangaw kawaw a siled.

ngem kadagiti abaga a matiltiltil
panagsapul-pangpunno pagbagasan a kawaw.
masakbayan maituloy latta a mayuged.

maukag ita libro ti sirib ken panagtalek,
mayula pinningki panunot ken adu nga am-ammangaw,
mapno manen iti arimbangaw kawaw a siled.

ditoy, dagiti balikas maanag a kas daniw
manggubbuay samiweng iti lubong a kawaw,
masakbayan maituloy latta a mayuged.

marikna ti sam-it-pait kadagiti garatigit ken ginnantil,
pannakabsog a di magatadan awanan gatad nga araraw.
mapno manen iti arimbangaw kawaw a siled,
masakbayan maituloy latta a mayuged.








SAPULENKA KADAGITI AGSAPSAPUL ITI AGSAPA


padasenkanto latta a damagen kadagiti masabatko
a nakasakbat kadagiti nasukainanda a plastik,
karton, lata, landok; saludsodek no naanninawandaka
iti bassit a lubongda; no nasaepda ti ayamuom imetmo
a napurdot a sabong iti kannag; no napurarda iti kawesmo
a nabagisan iti nangisit; no nariknada ti ipangpangasmo
a lamuyot ti naarmidoran a kudil; no nananamda
ti tinapay a namasa iti ling-et dagiti kuton…
ngem awanka a naanninawanda, naangotda, nariknada,
naramananda, ngem naburburtiaanak iti kunada:
“kinamatna ‘diay ipus ti kimat
a tengnga’t aldaw!”

naimayengak, natangadko ti langit—
sika kadi ‘diay ulep a nangabbeng
kadagiti bantay iti laud?

agingga a di matnag lua ti langit
sapulenka latta kadagiti agsapsapul iti agsapa…

(Agosto 15, 2007)

Salemsem iti Taeng

Naimatangak panaglemmeng ‘diay bulan
Idi turongem ruangan ti inaladan
Kalpasan ng inyibbetmo:
“Agsubliakto met laeng ‘ton agpayakpaken
Kalapati iti tuktok-wagayway;
Tapayaem ni Dayunyor!”
Manon a kalgaw ti naikupin
Ngem ti pul-oy-amian napaidam
A mangyagek koma iti iliwmo ken seggam.
Ngem adtoyak latta: invictus
Kadagiti mingming mata ti allawig
Ta iti dakulapko diak kayat a matippay
Imbatim a bin-I ti masakbayan.
Iti naminsan nabatiak nga agngatangata
Idi asitgak ni Dayunyor a mangmatmatmat
Nalinak a baybay a nagkunaanna:
“Narasin, Nanang, sigay ni Tatang…”
Insungbatko: “Dika madanagan, Anak,
Sumangpetto ti Amam.”
Inamadna: “Kaano, Nanang, inton naataben ti baybay?”
Sadino man yanmo ita, mariknam koma iti agek-pul-oy
Salemsem ditoy binangonta a taeng!

(Rimat, Hunio 2004)










Sapsapulek Ti Blakbord

Nasapa ita a maiddep ti silaw iti siled
Di maibus ti kape a pangbugiaw iti ridep
Naulimek ti makinilia ken kompiuter
Nakaidda laeng dagiti bolpen, pentalpen ken ruler
Makaiinnistoria ita ni Dayunyor
Ta naginana ti tsok iti agkupkuplat a blakbord.

Iti ulimek ti rabii, sapsapulek met latta
Dagiti subeg, tuleng, di maawatan a kababalin
Naitalek ken maitalek nga ubbing- adda
Karayo tunggal aldaw a kapulapol ida
Nupay paltuadenda dagiti uban a nasapa.

Mapampanunot ita: naitedko ngata ti sungbat
Adu a saludsod iti pampanunotda? Naawatanda ngata
Ti imbaskag impasagepsepko kadakuada a sirib?
Wenno intayab laeng awis ti biliar ken kompiuter?

Wen, sapsapulek latta ti arimbangaw iti siled
Iti kanito nga idasaynak ti iliw, guyodennak ‘toy isip
A mangbalabala no kasano nga isaruagko manen ti tabukol!

Mariknak ti arep-ep ti agkuplaten a blakbord--
Napatakto latta koma dagiti letra ti agsapa a mayulana.

Wen, kailiwmi ken blakbord ti tunggal maysa…








AGNUNOGAK ITI BAYBAY

Agnunogak ita a bakasion iti baybay--
Adda iliw a diak mainaganan ‘toy barukong
A dumap-aw iti ngumisit ngem napino a kadaratan
Ta diak man la nasarungkaran iti naunday a panawen:
Nakumikom dagitoy dapan a nakikinnamat iti anges
Iti tengnga ti iriag, sulpeng nga ubbing
A di mangikankano kadagiti maimuttal a bisual eyds!

Wen, kayatko ita ti agnunog iti baybay
Ta bareng mayayus kimpet a tekkab a parnuay-tapok;
(No apay met ngamin a di madepdep iti tudo)
Pumudaw dagiti kuko a nayarado iti bantay
Iti panangtunton kadagiti nagliway nga adalan;
(Ngem, ania ti kunaem no awan pagplete, kunada?)
Patibkerek pay linas relasionko iti Namarsua
Kadagiti adu nga agsapa nga impaayna;
(Di mailadawan nga ayat ti Dios ti nakaparsuaan)
Ken mangrikna iti apiras arakup ti pul-oy
A karkardayo iti uppat a suli ti siled dagiti tsok ken blakbord--
(Ngem uray agkuplaten adda latta maimdengam a samiweng)
Ta iti panagsubli dagiti makatitileng nga adalan
Sitatakderakto latta a mangbalabala’t masakbayanda.

AGINDAYONAK ITI AYAT

Suksukdipak ita iti anep
‘Toy nabuttawan nga indayon
Napalinis a naimbag dagitoy uway
Nga ar-aramatek a binakirko pay
Iti kabakiran a napno’t uleg.
Anusak daytoy nga aramid
Ta diakto met inan-annadan
Ti nagindayon iti kallabes a tawen
Adu unay dagiti inlubbonko ditoy
A bin-ig nga agtedted a nangrunot
Iti lagda dagiti nailaga ’toy nga indayon
Ket sakbay ngarud nga agrupsa
Daytoy a tawid, mabatiak a manglagda
Ta iti masungad igalutko manen
Ti agsumbangir a tali iti sanga
‘Toy langilangan a sagat
Ket agindayonakton iti ayat
A pangawisak kadagiti agbirbirok
Ti inana uray apagdarikmat…

(Bannawag, Pebrero 25, 2008)


ALSONG

Daan unayen daytoy alsong a nariingak
Malagipko unay dagiti babbaro ken babbalasang
Nga im-immay naglebbek iti linubian
No kasta a kabus, nalawag ‘diay bulan
Nagsam-it man ti inda innangaw
A kaaduan a nagtungpal iti nadaeg nga altar.
Iniliwko met a mapasamak koma ti kasta iti biagko
Ngem pinaglumenen ti panawen ti lubi-lubi
Idi mangrugi nga agsapul kulibangbang
‘Toy ikutko nga alimbubuyog.
Napatak pay iti lagipko
Ti estoria da Apong Lakay ken Apong Baket
A ditoy nga inanusanda a binayo pagay a binettek
Nga indasarda iti dulang ti masakbayan
Dagiti bin-i a pinatanorda.
Dagadagan ‘toy alsong, maipaspasulin
Kibkibkiban metten ti anay ti pagbayo
Ngem kinuna da apong a didanto isukat
Iti pirak ta agtultuloy latta ti akem
Ti alsong a manglebbek kadagiti bulbulong
A mayagas iti muging sumarsaruno a kaputotan.

(Naputar, April 6, 2008)
ATAB ITI LINAO

Adda atab iti linak ti baybaymo.
Mariknak ti dawel: guyodennak ti awiwit
nga irarem iti daeg ken pusaksakmo:
isu ngata a naidaknir
dagiti lulo no kasta a mawayatan ti lansadmo—
bubudo iti arapaap dagiti annakmo,
ken in-inut ayanud dagiti dalluyon
ti daga ti tarigagay a mangkeppet
iti aangsam…
iti panangiwayatmi iti daklis
iti dayta nga isisingising ti init:
inarakupnak ti pul-oy-amian
ti irteng ti naiwatwat a sabuag-allon…
naibubo ti bugi ti bannog: rimmisak ti ragsak,
nagmaris ti tangatang, nagkanta ti aglawlaw…
ngem iti pannakaibuang dagiti annakmo
nagngirsi ti allawig iti intanggayada a lagpi:
nakaipisokan gunggonada a nakitimpuyog
ngem kas kalawag ti bigat ti kinapudno:
kalawakaw, inanay imetda a tulos ti saranay.

Linao= maysa a barangay ti Aparri, Cagayan
(Bannawag, Hunio 10, 2002)

UNGOT TI KINAPUDNO
(Ken ni Lilong Roman Matias)

Kumarasakas dagiti dawa iti saplit
Ti agpagunggan a rikna riniwriw nga ikikinnit
Ngem ti tarigagay di man la naeppes
Sitatakder latta nupay kumkumotan dagiti ulep.

Ngamin sika ti apuy dagiti arapaap
Sungrod iti manglangeben a namnama
Ken pedped pannakawaw sang-aw
Baresbes nagares, natikag a duayya.

Linukagmo dagiti mata ti wayawaya
Iti inkayabmo a yaalsa kadagiti tanap ken aplaya
Nupay nakiddit ubbog pannakitakunaynay
Iti nagan ti talna, nasam-it ti maidasay.

Imkis ti mission: “Get Aparri!”
Timmangadka a nangtimud iti ayug
Dagiti dawa ken pandan nga ilillili
Angin iti nasapa a parbangon.

Nasiit dana nga agpa-Linao
Ngem nabengbengen dapan iti tarumamis
Ta nasged tarigagay a mangadak
Ti lubong baro nga aldaw.

Adu dagiti inluges ti anglem a kadaraan
Iti adalem ken naallon a sabangan
Ngem sika latta ti sika a kawar
A di napekka iti rungsot dagiti sugat!

(BANNAWAG, Hunio 4, 2001)


DENGGEM MAN, ALA , TI LUBONG

denggem man, ala, ti lubong
ti bambanti a pakasaritaan
ti nagambision a di met nagarapaap

denggem pay, ala, ti lubong
ti narehasan a namnama
ti biag a tallikudanen ti lawag

imutektekam met ti lubong
ti paggaak balangkantis
a nakatugaw maliblibian a trono

imutektekam pay ti lubong
ti bumbumsag nga agsapa
ti nakaammal iti balitok

imdengam met ti lubong
ti nagsanga a rupa ti tao
iti sarming ti biag

kasta met nga imdengam, ala, ti lubong
ti um-umkis a paggargarawan
ti arapaapmo, ti biagmo, ti aminmo

kalpasan a maaramidmo dagitoy
ituloymon ti umaddang!

(Saringit Chronicle, July 4-10, 2000)
(Bannawag, Setiembre 8, 2003)
( Salinong)




SAMIWENG: KENKA INA-A-DAGA


duayyak latta ti libnos
ngayed pakabuklam iti apros
ngernger kinnit ti gundaway
a sumangbay, di pumanaw
‘toy biag, ‘ta biag…
tagiimnasek latta ti saplit
ti rang-ay iti kunggam
kired a kumamang iti tulbek
dagiti maiwawwawa a dayaw
‘toy biag, ‘ta biag…
diakto latta tabbirawan
nabatbati pay a pusaksak
matdaak a mangyikkis
agpasag la ketdi ti agsapa
‘toy biag, ‘ta biag…
agayusto man lua ken darak
iti rikut-risgo dagiti dangadang
ngem pumsuakto latta ubbog-daniw
a mangsebseb aggargarakgak nga apuy
‘toy biag, ‘ta biag…

(Naputar, Pebrero 6, 2000)

DUNG-AW

bungaak ti naregreg a linnaaw
iti nasapa a bigat
pilit a rinuros gayebgeb ti init
ngem nagtalinaedak a sikikidser
a nakirupak a nakabuniagak
iti alingasaw dagiti dingraw
kadagiti di mairkirkiran
a kalsada ti siudad.

nagrusingak kadagiti naipilkat
a pitak— masibsibugan iti tapok,
asuk iti sirok agpagunggan nga init
idinto a pannakailutko
kadagiti kugtar, danog, tungpa
dagiti kimmayetket a balite.

ditoy lubongko di maanninawan
ti agsapa
ti namnama
ti yaalimpatok.

sadino ti ayan
ti agsapa?
ti namnama?
ti yaalimpatok?

Tatang, Nanang
sadino ti yanyo?


(Naputar, Marso 11, 2000)



SUTIL NGA ISEM TI WAYAWAYA

makikulangtot latta no kua ti sutil
nga isem ti maipalpalayupoy a bang-i
ta isalana bassit ti kinnit-purga
taraon a dina pulos matallikudan
iti rabaw lamolamo a panganan
ta pinadsot’ dung-aw dagiti oda
ti dan-aw dagiti arapaap…
idinto a gantilek met iti nagan
ti binting a kaasi
tapno nanamek met sam-it iti suya
dagiti eppes a dawa bareng matiliwko
ti tibker-- kired iti naatianan a pigsak
a mangsuba:
kidday ti doliar, ayek-ek ti oil price hike;
anglem dagiti nayatang a kalintegan;
busi ti agsisimparat a panirigan;
panagtitipkel agkakaburik iti trono…
ta idatonakto ida salmot’ panagpigerger
ket nalakakto laengen a bugtaken
simutsimot iti kingki ti pirak;
propitario iti diro dagiti mintalon;
Magdalena iti moderno a panawen
ken siniten dagiti arrap iti kinapudno
tapno agayamuomto latta pinnateg
da Anchises ken Venus!


(Maikadua a Gunggona, on-the-spot poetry writing contest, maika-31 a nasional kombension ti GUMIL Filipinas, MMSU, Batac, I.N., 1999. Impablaak ti SARINGIT, Disiembre 12-18, 2000 isyu)



HAIKU
( Para iti Ayat)

Agalla-alla
Ti ayug ti rabii
Ginget-bambantay.

Agan-anangsab
Banarbar a balikas
Sellang-burayok.

Aggulgulagol
Gingginammol ti essem
Gukayab-langit.

Agdaldaliasat
Ramut ti kapanagan
‘Ti puseg-rimat.

Ket sumangbayto
Arigenggen ti lubong
Pumsuak ti ubbog.

Ay, ta ti bin-i
Mabukel a kas baggak
Matangtangadto.

Ta kasta ngamin
Bukel a maitukit
Sidong Suso Beach !

(Maikatlo a Gunggona, on-the-spot poetry writing contest, iti panagsuratan ti Haiku nga inesponsaran ti Association and Authors of the Cordilleras a panglagip kadaydi Dir, Pelagio Alcantara. Naangay ti salip iti maika-34 a kombension ti GF iti Suso ni aran Beach Resort, Sta. Maria, I.S.)
MARAG VALLEY

Awanen ti pannakausar ti puwersa ken armas… Naglabasen dagitoy!!! Ti magna ita ti pannakausar ti peaceful means… -Fr. Conrado M. Balweg, Disiembre 27, 1999.

adda maipasngay nga ibit
iti ubbog pedestal ‘ta barukong
nga agallangugang iti Blue Heaven
ken agapon iti Hamburger Hills.
adda ikkis iti arasaas-angin
a mangsallukob panunot-pakinakem
dagiti kaputotam nga Isneg—
murkat daydi bambanti a bannawag
ti Oplan-salidummay!
kaano nga agayamuom dagiti sanggumay
iti nakabatbati a kabambantayam?
kaano nga agkanta lagitik
dagiti agkarayam a linnaaw?
kaano nga agtadek dagiti tumatayab
iti sappuyot angina-amian?
ken kaano nga agayus manen ti tapey
a mangpedped waw ni Kabunian?
urayen kad’ pay a sumged-kandela
daydi nagpakadan a malem
sakbay a riingem manen urat-Bantay Samsambiri?
agtignayka! Ummongem nabati a pitik dagiti bituen
nga idaton iti altar da Baal, Asera ken Artemis
ta inton dumteng panagluat’ langit
ikuyognantot’ mamaglunit kadagiti rettab
a mamagbaliw iti an-anayen nga Orbis Pictus!

(Maikapat a Gunggona, AVAIL, 2000)



INTON MALUKAGKA, ANAK

Maturogkan, Anak, atiddog pay
Ti biahe a talantanem, ubing
Ti rabii ket naimas ti rumidep.
Bay-am a bussogennaka dagiti tagainep
Ken itayoknaka dagiti Pamaskua a samiweng
Sadiay nanumo ngem napnuan talged a Belen!

Ala, maturogkan, anak, diak kayat
A mapuyatanka a manguray iti bigat
Ken makitam yuulogko a mangpanaw kadakayo
Ken ni inam. Ngamin, rumbeng nga ituloymi latta
Nga ikayab ti wagayway a daradara itan
Sakbay a pisangpisangen dagiti kali nga awanan payak!

Imasem ketdi ti lili ni inam ken ti sariugmana
Bayat a nakakidemka, dika agmulagat
Diak kayat a masirayam luana nga agarubos.
Bay-am nga agtedted a kas linnaaw, bisibis
Ti umap-apuy a saludsod iti kaunggam:
Ania ti Paskua, Tatang?

Ala, maturogkan, Anak, agur-uray itan
Ni Rizal idiay plasa. Subliankayto ken ni inam
Apaman nga umisem ti bannawag ken nawaya manen
Ti tumatayab iti tuktok ti wagayway
Tapno inton malukagka, ammomton ti Paskua
Ta dimto metten maimdengan Bulong Ti Apatot…

Ala, maturogkan, anak…

(Maikapat a Gunggona, AVAIL 2001)


PANAGIBUYOG I


Ngimmisiten daytoy bigao ngem maanninawan
Pay laeng pintek pannakalaga ken lagdana--
Makipinnaut iti panawen a kunada.
Malagipko idi sangalen daytoy ni tatang
Addaak idi iti Gred Wan, kaduakadduana
A mapan agala iti kawayan agingga
Iti inna panangkayas, panangsukog.
Kinunana idi: ditoyto nga ibuyogmi ken inam
Dagiti mairik a pagay, agingga nga agbain
Dagiti ruot a pasalsali.
Ita ta modernon ti panagtalon, di latta maibbatan
Da tatang ken nanang ‘toy bigao:
Armasda latta iti inda panagkakainaran
Kunada: iti biag, ania man panawen,
Agtultuloy latta ti panagibuyog…



PANAGIBUYOG II


iriken latta ti puli
ti nagapas a dawa
iti kinelleng ti biag
maurnong
iti iket ti anus
mayalison
iti bigao ti kinaasino
maputar
ti sagawisiw—
pangayab iti pul-oy
a mangannong
kadagiti eppes a dawa
ta iti pannakaurnong dagiti pintek
agkanta ti dulang,
mapaksiat dagiti ugaw
mamutittit ti boksit
matimud ti tig-ab.
GUMIL, agnanayon ti panagibuyog:
agamang mabsog!

(Naputar, 12:43 P.M., Abril 19, 2008 bayat ti maika-40 a kombension ti GF a naangay idiay Cauayan City )

BALLESTEROS: DANIW 1


Agsaganaka ta agsangpeten
Annakmo a nangpanaw kenka tapno birokenda
Sungbat arapaap iti sabali a pagilian
Nupay maitedmo met koma ti tartarigagayanda.

Isaganam patupat, puto, linapet, ken bibingka
Kasta met sinuman, tinupig ken dimo liplipatan
Tinubong nga ingge’t imas a nagbalinen
A simbolom tunggal aldaw ti Paskua!

Isemam dagiti annakmo, pasangbayem
Iti agrakayan a pagtaengam bareng makulding
Ayat ken asida ket tulongandaka
A bumangon agdama a kasasaadmo.

Wen, ipaaymo kadakuada anag ti Paskua
Nupay agkiraos ‘ta boksit!

(Bannawag, Enero 4, 1999)




ITA TA ADDAKAN

diak itan a daniwan:
ti umbi ti sumappuyot nga angina
a nangyeg ayamuom ayatko kenka;
ti rimat naiparais a bitbituen
a silnagko ruangan ‘ta puso;
ti kayaw kristal nga ubbog
a sarmingko kadayta sadiam;
ti pikapik baro nga agsapa
a namnamak a dimmupir kadagiti pannubok;
ti ngayed nakaparsuaan
a samiweng barukongko nga agunnoy…

wen, diak itan a daniwan dagitoy
ita ta addakan nga ayatko
ken pakabuklan dagiti daniwko
iti agnanayon.

(Bannawag, Agosto 23, 1999)








ANAG TI PASKUA

Tibnokak iti danum ti umap-apuy
A gil-ayab ‘toy barukong
Tapno masebseban bara dagiti dangadang
A gubuay agpatangatang a magatgatang!

Laokak latta iti anus
Ti tunggal lutuek nga adding
Tapno malinay ti masakbayan
Nga idasarko iti dumteng a bigat.

Bay-ak nga agyus ling-et pannakapaay
Bareng yanudna rituer rekado
Ket mabati sustansia ti naisaang
Nga arapaap iti kaldero ti biag.

Itig-abkonto ti ragsak
Nga ipayapay sumangbay a sinamar
Ket isemakto dagiti nagmanto a kalman,
Anag ti Paskua palaemek ‘toy kaunggan!

(Bannawag, Disiembre 20, 1999)



IPIS-ITAKTO ITI SILI

Agorderak latta iti pansit
Ken Coke iti suli-daeg ti Jollibee
Ngem di ammo ti serbidora no apay
Nga agmaymaysaak, nalabit kunaenna
A mabisinak ket kasapulan pamedped—
Isemakto laeng ‘ton yawatna
Ti orderko…
Pasarunuakto iti subo ken lagip
Ti ayug-samiweng ti karaoke
Ta nupay agtukiad panunot
Bumangon latta ti pakabuklam
Iti sangabaso a Coke
Ngem matdaak laeng a mangmingmingming
‘T kayawmo…
Ipis-itakto iti sili ti pansit
Bareng maadatanna lemma nga imbati
Ti manangrabngis nga ayatmo
Ket bay-akto nga agayus pait ti lua
Iti naatianan a baso ti Coke
Bareng matiliw ti serbidora
Ti gapu a dimmagasak!

(Bannawag, Marso 27, 2000)
BATIBAT

lemmesek pakabuklam
ta inton mausawanak
imulak ditoy isip ti batibat
dagiti naglabas a darikmat
iti nagbaetanta
ket baliwakto ti sumekkad!

(Bannawag, Agosto 26, 2002)


DAMO A SUBBUAL

Iggamam met ita ti rienda
Tapno ibagnosmo dagiti nakullaapan
Iti umno nga adding iti nalinteg a dalan
Bareng makamatanda pay ipus ti balligi
Ala, petpetam koma
Ti dungngo ti pannakaawat… dimo ipalubos
Nga agbalin a sansilmo ‘ta biagmo
Tapno din maulit pay nadara a pakasaritaan
Dagiti impagarup a saranay-- sungbat ti araraw.

Agbalin koma ngarud a nabunga
Damo a subbual iggemmo a turay…

(Bannawag, Mayo 24, 2004)


KIDDAW

Mariknak araraw maregreg a bulong
Iti kimmarandikang, mawaw a daga.

Mariknak dung-aw makusbo a kayo
Iti ngernger, ngirsi ti batibat.

Mangngegko ikkis marebba a bantay
Iti bukual-arado dagiti makina.

Makapleng sainnek agnguynguy-an nga ubbog
A nakaipasngayan ti punganay.

Ay, kayatko koma nga agrusing pay
Dagiti bin-i a maidaton iti kaputotan…

(Bannawag, Hulio 5, 2004)



KARIT

agtipa dagiti ramay iti keyboard
ti kompiuter saan a tapno ikur-it
ti ikkis-rikna ngem ketdi gutad ti agdama
ta iti monitor maanninawan
ti ablen nga ules-masakbayan
iti digital a biag…

naunas dagiti biddut a maldit
a kas pannakaungaw dagiti batonlagip
ti dangadang dagiti maingel iti Ina-a-Daga
ngem dinto latta kabaelan a okriheren
ti printer dagiti nabekkel a command…

adtoy ita ti dakkel a karit
iti asaken a digital a panagbiag:
dinto matallikudan analog
a dalan-impormasion ken ubbog-biag
ti pentium nupay naburnok ti modem
ta agirig latta ti masakbayan iti napalabas!

(Disiembre 27, 1999; 7:30 P.M.)



BUBON

Butuag ti danum a tawingen?
Pipikelenna dagiti ima ti pursige
Lasangenna palapala ti sirmata
Ngem agnanayon lattat’ pannakayaplag
Ikamen ni arapaap-- pakaipasngayan
Bin-i ti regta!
Maitim-og ti timba iti nadagaang
A lusob ti kari
Ket maruros sabong-anus,
Agallangugang ti karit:
Bay-am kad’ lattan ngirsi ti alinuno?
Angayem ketdi nabatbati a pitik
Tawingem latta ti arep-ep
Ta iti sumangbay nga agsapa
Mariknam a ti butuag
Saan a krus!
(Naputar, May 13, 2003)

AGGANGGANAT NGA ARAPAAP

nakitak dagitoy iti anniniwan
ti aggangganat a baddek-sekkad
ti di agpabatubat nga arapaapmo
a mangadak lubong-bullalayaw:
nakusel nga addang
inittip a panirigan
nagares a pammati
Payatas a kinataom
binallaaganka
ngem intuloymo latta ti nangkanta
iti agin-inanan a rabii
ket urayka la napasidduker
iti panagtaguob dagiti aso!

(Nasurat, Enero 31, 2001)






PUOTEM

agridamka, dika paiturayan
iti bang-i-awis dagiti atang
agbaribari, agdayodayoka
dimo dalapusen a kas angina
dagiti bua, karurayan a manok
ken sinukat iti lamisaan:
narigat ti agpiwis!
aglutoka ketdi iti grasia
nga agas-asimbuyok ti banglona
a naani iti ling-et ken dara.
(saan a dara ken ling-et ti sabali)
ngem puotem ta adda latta
dagiti naambing-- dimo liplipatan
ti agiwarsi sakbay nga agisakmolka.

(Nasurat met laeng idi Enero 31, 2001)



BEINTE
(Sagut Kadagiti Mangmangged)


nalabaga ti maris ti papel ni quezon, saan nga oreyns,
kadagiti mangitagtag-ay kadagiti gemgemda ken kankanayon
a makikinkinnamat a dapan kadagiti agkiamkiam a lansangan
ti agkamanaw a siudad-- naluto latta ti arapaap iti dakulap
dagiti nagpapatang iti siled a sumilsilap, awanan timek
dagiti pannakabagi, kasapulan ti pannakakiraud iti aklo
ti boksit a pagiliglig-isanda ita— makabsog ngamin
ti pannakilanglang iti latok dagiti buaya
nga agud-udaod karayan iti likud ti malakaniang.

awan nagan daytoy a kaasi, wenno pannakabarat ti anges—
panagsilamot laeng iti diro, dinto dumanon iti boksit
ti payapay a ragsak daytoy maris-dara a papel.

dagiti gemgem, dagiti dapan, maitag-ay-maikuy-adda latta
agingga nga agkankanta iti sintunado dagiti salakan,
ken adda dangadang dagiti babassit ken dadakkel a bituka
saan a mabubos ti ikkis a maisurat iti pakasaritaan.


(Naputar, Mayo 17, 2008, Bannawag Pebrero 2009)

NO MAKAKITAAK
1. No makakitaak iti billit
a tumalangkiaw kadagiti
agrupsan
a bantay
saan a diak mapanunot
sabali a rupa
ti panagdur-as…

2. No makakitaak
iti ubing
nga agkunkunnot
iti inangin
a mamador
saan a diak malagip
pinningki-panunot
iti Palasio…

3. No makakitaak
iti sensilio
a maipayatpayat
kadagiti mawaw
a lansangan
saan a diak iseman
ikkis nakaimet
iti plakard…

4. No makakitaak (koma)
iti bassit
a rissik
ti lawag
iti baet ti ulep
saan a diak agkanta
iti samiweng
a mawatan ti amin…
(The Valley Journal, December 13-19, 2005)
HUETENG

malukagak iti karayo
ti tagainep iti ubing pay
a rupa ti rabii
ta artiokannak iti awis
dagiti naisaang a numero:
sais a kiad, uno a kalsada,
katorse nga angot-payatas,
beinte siete no gentleman…

iti bangkag, gutad a gutad
ni Sawak a nalamiisan ti boksit
idinto a nakalikigen ti init.

iti balay, agdungdung-aw
ti pagbagasan, naatap
dagiti paludip ken lailo
idinto nga agburburek
ti kaldero kadagiti sumada
ta isaangannak latta ti kobrador:
piangpiang, tumbok wenno bual!

agsagawisiwak koma ita a bigat
ta nalangto dagiti ruot
iti kuman ngem di metten agarab
ni Sawak; nalamiis payen
ti pul-oy balay
(saan a pagtaengan…)

(The Valley Journal, August 23-29, 2005)





ASO

Aalagaa’t palalakihing kaibigan,
Maaasahan sa lahat ng oras,
Magbabantay sa buong magdamag
Nang di mapasok ng mga hangal
Ang itinuring na ring tahanan.
Sa kaunting pagkai’y walang reklamo
Obligasyo’y ginagampanan ng totoo;
Pagsalitaan man ng nakapapaso
At saktan ng todu-todo—
Mananatiling nakawagayway ang buntot sa amo.
Ang masakit ginagawang pulutan—
Azucena, dinuguan, hilaw o dinakdakan—
Ng mga taong ang tubig ay alak
Kaya siguro ang mga aso ngayoy may kamandag
At kung bakit magkakapitbahay ay nag-aaway!

Ang mga aso kapag kumahol ay may dahilang ukol
Hindi kagaya ng mga pulitikong kahol nang kahol!

(Liwayway, Hulyo 9, 2001)





KUHOL

Sa paglusong sa bukid, kasa-kasama ako
Ni tatang. Itinuturo ang mga paraan
Ng tamang pagtatanim at kung paano
Aalagaan. Hindi raw lahat ay kaginhawaan
Ang dulot ng paghahalaman, kadalasan daw
Ay sakit ng ulo. Kung hindi listo
Tiyak na perwisyo ang aabutin
Pagtiyagaan dawn a pulutin, huwag bombahin
Ng kemikal ang mga mapanirang Kuhol
Sa palayan. May ginhawa raw itong maidudulot
Sa kalikasan at sa tao.
Sabi pa ni Tatang: lalong lalakas
Ang mga peste kapag masanay
Sa panunupil. At lalo lamang silang maging
Sagabal. Gaya raw ng mga nakaupo sa luklukan
Ang mga kuhol— nanginginain!

(The Valley Journal, august 16-22, 2005)







MAYA

palipad-lipad sa kalawakan
ng kemikal at pestisidyo
sa bukid ng pag-asa
ng nasakang pangarap
pero batid kong humihiyaw
‘yang isip sa sabeng
ng nakalatag na gipi
ng aanihing bunga
ng ipinunlang pawis.

an’a ngarud, wala namang
bagong daigdig sa balintataw
ng tao sa bawat hakbang
na gawin at gagawin
mas lalo nga nilang
nilalasing ang katahimikan
ng payapa mong daigdig.

hintayin mo na lang
na puminid ang pinto ng dilim
baka sakaling magpahinga
ang inuuod nilang isipan
at saka mo aawitin
oyayi ng gabi…

(isang berso, The Valley Journal, July 12-18, 2005)








HAIKU (Iti Daklis)

iduron bilog
manipud kadaratan
‘ti bibig allon

biagen makina
nairidep a lubong
sadinot’ ngudom?

itinnag angkla
ket paliiwen risak
ikan aglawlaw

iwayat iket
tarigagay ken anus
taaw-namnama

guyoden gamaw
nailakub a panggep
a napnuan isem

ikkaten lulo
a simrek iti bubo
sakbay ti budo

ilasin bun-as
naidaknir a bunga
a sobra ti yo

ta inton bigat
mabalbaliwan manen
agkalap biag

(Naputar daytoy bayat ti maika-34 a kombension ti GF a nangabakan ti Haiku ( Para Iti Ayat) iti maika-3 a Gunggona)
PANNANGAN

Maulit-ulit daytoy a buya: iti panganan,
Kabarbaro a kanayon ti putahe iti bandehado
Mapagbibinggawan, mapagraranudan;
Ti lamisaan— agkadua, agkatlo
No mainsan di ammo no agkamano
Agduduma dagiti mausar a kutsara, tenedor
Ken pinggan. Addada dagiti agpulutan a dagus,
Dagiti mangrekado manen iti sabali
A raman: naadat, nasam-it, napait, nananam
Idinto a dagiti dadduma, matdada nga agsisiim
Nalabit kunada iti bagida: saan ngata a makasabidong
Daytoy a taraon? Naim-imbag kano a paliiwenda pay
Dagiti immunan a nagpasar ta amangan ket no agulawda!
(Ngem di ngata nga isuda dagiti di makaammo nga agluto?)
Ket inton siit wenno tulang laengen ti nabati, tumanauldan
Ngiawda a ngiaw, kasla dida makaanak a pusa
Idinto a dagiti agtiltilmon iti aglawlaw, kudkodenda laeng
Dagiti sikoda sakbay a sanguenda ti insaganada met
Iti dulang nga inabraw a dinengdeng: aggigiddan ditoy
Ti kammet ken panagtig-ab!

(Abril 21, 2009, 11:45 A.M.)


KINAEM TI DAGA TI BURAYOK

Agkinni ti isip ti langit iti tugkik ti lawag
A mangsalput kadagiti kimmarandikang a dan-aw
Ti daga a nangabbeng iti uratna: agpababa
Dagiti mapulting a tagainep iti bara kadagiti bulong
Dagiti nakamulagat a kayo—saggabassit mapessaan
Agkiamkiam a sang-aw iti yaarakup ti bisibis, agpigerger
Dagiti mautoyan a derrep; malukaisan ti barukong
A naunday nga intalimeng ti lampin ni pammateg---
Rumkuasen ti aglemlemmeng a dalag iti rukib
Tapno imatanganna manen ruangan ti langit
Ken mangsukisok iti paraiso: ay, uray la agsung-ab
Ti anges, agpipikel dagiti lasag, agrimat
Dagiti bituen, maregreg ti lua iti dayyeng
Agingga nga agkirpa ti aglawlaw—
Agulimek ti tangatang!

Iti agsapa, kinaem ti daga ti burayok ti ragsak
Nagrusing ti bin-i a mangitudo itan
Iti nawaknitan a law-ang!



TUKEL-LING-ET

Di rumkuas ti anges
Iti adda a daga
A sakup a nabukatan
Ti naipasngay a pluma
Ngem kas iti ubbog
A nagayus ti danum
A nangkamat-anges
Ti kumtiig koman
Nga urat-kinaasino
Ket maipasngay ti binnatog
A nagsaknap iti barukong
Immagibas anglem-sensia
A nangbatibat bugas-bagas
Naimaldit a kinaasino
In-inuten a malaylay
Dagiti sabong, matnagda
A paappupo iti daga
Awan nabukel a busel.
Agpangpangta ti igaaw
A mangpadapo agsulbod
A saringit nagramuten
A tukel-ling-et.
Ngem ti orasion
No koma laeng ta agubbog
Puso ken isip
Sumangbay ti anaraar…







Saan A Kastoy Ti Pammateg

Saan a kastoy ti pammateg, nalabit a kunam
Awan iti murdong ti dakulap ken tadem
Dagiti maasut a balikas wenno iti ipas
Dagiti umap-apuy a bola ti imamatmat

Wen hustoka…

Kunaem pay siguro, ania ti nagan ti bara
Ti pammateg no iti kada agsapa nalam-ek
Ti umagibas a pul-oy: awanak dita sibay
Ta addaakon a makikinnamat kadagiti daldalan?

Dika mababalaw…

Salsaludsodem pay ket ngata no ania ti langak;
Kas met la ngata kadagiti mangmangngegmo a bida
Kadagiti sariugma da Apong Lakay ken Apong Baket:
Nataer, masirib, nasingpet ken mapangnamnamaan?

Matmatannak kadagiti tagainepmo….

(Adayo, iti panagkunam, ti baetta
Ngem masapul daytoy a pagteng iti panangurnosko
Iti rangtay a dalanemto iti masungad nga aldaw, Anak.
Umanay koman a mangleplep iliwmo ti dengngepko iti agpatnag…)

-jobert ma. pacnis


(Nasurat daytoy idi 14 Pebrero 2009, 12:55 P.M.)